మా గురించి
నాకు జన్మనిచ్చింది ఎం.ఎన్. రావు గారు. ఇప్పుడు అందరికీ నేను ఎమెస్కోనే. తెలుగు నేలపై ప్రతి ఇల్లూ నా ఇల్లే. ఇన్నేళ్లుగా మీరు నన్ను ఆదరిస్తూ, అక్కున చేర్చుకుంటూనే ఉన్నారు. ఇప్పటివరకు నాలుగు వేలకు పైగా పుస్తకాల రూపంలో మీ చేతులకు చేరాను.
1950
స్థాపన
6,000+
ప్రచురించిన పుస్తకాలు
500+
రచయితలు
75+
ఏళ్ల సేవ
మా చరిత్ర
ఈ ఎనభై ఏళ్ల ప్రయాణంలో ఎన్నో ఎత్తుపల్లాలు చూశాను. ఎమెస్కో పాకెట్ బుక్స్ ద్వారా వేలాది నవలలను, సాహిత్య రచనలను మీ ముందుకు తెచ్చాను. ‘సమగ్ర ఆంధ్ర సాహిత్యం’, ‘ఆధునికాంధ్ర సాహిత్యంలో అనర్ఘరత్నాలు’ శీర్షికలతో ప్రాచీన, ఆధునిక సాహిత్యాన్ని అతి తక్కువ ధరలకే మీకు అందించాను. పాకెట్ బుక్స్ నన్ను మీకు మరింత దగ్గర చేశాయి. గురజాడ ‘కన్యాశుల్కం’ నుండి అల్లసాని ‘మనుచరిత్ర’ వరకు ఎన్నో పుస్తకాలు ఎమెస్కో పాకెట్ బుక్స్ రూపంలో మీకు అందుబాటులోకి వచ్చాయి.
బుక్ క్లబ్, ఇంటింటి గ్రంథాలయం
ఎమెస్కో బుక్ క్లబ్ ద్వారా యద్దనపూడి సులోచనారాణి, అరికెపూడి (కోడూరి) కౌసల్యాదేవి, పోల్కంపల్లి శాంతాదేవి, యండమూరి వీరేంద్రనాథ్, మల్లాది వెంకట కృష్ణమూర్తి, కొమ్మనాపల్లి గణపతిరావు, యర్రంశెట్టి సాయి వంటి ప్రముఖ రచయితల నవలలను ప్రతి నెలా మీకు అందించాను. ‘ఇంటింటి గ్రంథాలయం’ పథకం ద్వారా ఎమెస్కో ప్రచురణలనే కాక, రాష్ట్రంలోని ఎందరో ప్రచురణకర్తల పుస్తకాలను కూడా మీ ఇంటి ముంగిటకే చేర్చాను.
వేదాల ప్రచురణ
పేరొందిన రచయితల్లో చాలామంది పుస్తకాలు ఎమెస్కో ద్వారానే వెలుగు చూశాయంటే, అది మీ ప్రేమాభిమానాల చలవే. 2000 సంవత్సరంలో వేదాల ప్రచురణ ఎమెస్కో చరిత్రలోనే కాదు, తెలుగు పుస్తక ప్రచురణ చరిత్రలోనే ఒక సువర్ణ అధ్యాయం! ప్రచురణకు ముందే ప్రకటించిన ఆఫర్‌లో 2,000కు పైగా సెట్లు అమ్ముడయ్యాయి — తెలుగులో వేదాల ప్రచురణకు కావలసిన ఆర్థిక వనరులను పాఠకులే సమకూర్చారు.
భవిష్యత్తు వైపు
అక్షరం ఉన్నంత కాలం మీతో స్నేహం చేయాలన్నదే నా కోరిక. అందుకే కొత్త ఆలోచనలతో నన్ను నేను నిరంతరం కొత్తగా తీర్చిదిద్దుకుంటూ ఉంటాను. ఆధునిక తెలుగు భాషకు ఒక బృహత్ నిఘంటువును రూపొందించాలన్నది నా సంకల్పం. 2,00,000కు పైగా పదాలతో ఈ మహా నిఘంటువు నిర్మాణం ఇప్పుడు ఊపందుకుంది. ‘పొరుగు నుంచి తెలుగులోకి’ శీర్షికతో ఆధునిక భారతీయ ఆంగ్ల సాహిత్యంలోని ప్రసిద్ధ రచనలను తెలుగులోకి తీసుకొస్తున్నాం.
బాల సాహిత్యం
అంతర్జాతీయ ప్రమాణాలతో భారతీయ భాషల్లో బాల సాహిత్యాన్ని ప్రచురించాలని సంకల్పించాను. తెలుగు, తమిళం, కన్నడం, మలయాళం, ఒడియా, మరాఠీ భాషల్లో పిల్లల పుస్తకాల రచన ఊపందుకుంది. వాటి కోసం అందమైన బొమ్మలు కూడా సిద్ధమయ్యాయి. ఇప్పటికే 22 భారతీయ భాషల్లో 1,200కు పైగా పుస్తకాలు అందుబాటులో ఉన్నాయి.
అరుదైన, విశిష్ట గ్రంథాల పునర్ముద్రణ
తెలుగు నేలపై వెలువడి, ఇప్పుడు దొరకని విలువైన, ప్రసిద్ధ గ్రంథాలను మళ్లీ ప్రచురించే కార్యక్రమం చురుగ్గా సాగుతోంది. మొదటి విడతలో ‘కథలు-గాథలు’, ‘సాక్షి’, ‘కథాసరిత్సాగరం’, ‘ప్రపంచ చరిత్ర’ మీ చేతులకు చేరాయి. పుస్తక ప్రచురణ ఒక మహత్కార్యం. నేను కేవలం నిమిత్తమాత్రుణ్ని. ఈ ప్రచురణ యజ్ఞంలో పాఠకుల ప్రేమే హవిస్సు.