అందరికీ బాల్యం మధురమైంది. యవ్వనం విశిష్టమైంది. వార్ధక్యం క్లిష్టమైంది. వార్ధక్యాన్ని క్లిష్టత లేకుండా ఇష్టంగా మార్చుకోవడానికి బాల్య, యౌవనాలు ప్రాతిపదిక వేయాలి. బాల్యం నుంచి యవ్వనంలోకి అడుగుపెట్టే సరికి జీవిత గమనం నిర్ధారితం కావాలి. లేకుంటే ఏ పెద్దలైనా అతనికి మార్గదర్శనం చేయాలి. లేదా ఏ సంఘటనైనా అతన్ని మార్చాలి. ఆ మార్పు అతని భవితకు బాటలు వేస్తుంది.
అతి సామాన్యులకు, అట్టడుగు స్థాయిలో ఉండి శ్రమించి పైకి వచ్చిన వారికీ చరిత్ర ఉంటుంది. వారి చుట్టూ సమాజం ఉంటుంది. వారి జీవితంలో ఎగుడు దిగుడులుంటాయి. ఈ లోకంలో వివిధ రంగాల్లో ఉన్న గొప్పవారికంటే సామాన్యులు, సాధారణ జీవితం గడిపేవారు ఎక్కువ. ఉన్నస్థితి నుంచి కాస్తైనా ఉన్నత స్థితికి రావడానికి కొంత మార్గదర్శనం, అవగాహన అవసరం.
